TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Një 24-vjeçare me origjinë shqiptare ka ndërruar jetë në Itali, duke lënë pas dhimbje të madhe te familjarët, miqtë dhe të afërmit. Bëhet fjalë për Giulia Stefa, vajzën e një familjeje me origjinë nga Durrësi, e cila kishte lindur në Pietrasanta dhe ishte rritur në Viareggio.
Giulia u nda nga jeta në orët e para të 5 tetorit, pasi u ndje keq në banesën ku jetonte me partnerin e saj, Leonardo Zaia, në lagjen Terminetto të Viareggios. 24-vjeçarja pati vështirësi në frymëmarrje dhe gjendja e saj u përkeqësua brenda pak çastesh.
Partneri i saj njoftoi menjëherë shërbimet e emergjencës. Në banesë mbërritën autoambulanca dhe një ambulancë e Croce Verde, por e reja kishte pësuar arrest kardiak. Mjekët nisën menjëherë reanimimin dhe ajo u transportua me urgjencë drejt spitalit Noa në Massa.
Pavarësisht përpjekjeve të mjekëve, Giulia nuk mundi të mbijetonte.
Katër vite më parë, aksidenti që i ndryshoi jetën
Jeta e Giulia-s kishte ndryshuar katër vite më parë, pas një aksidenti të rëndë në pistat e skive në Abetone. Gjatë skijimit, ajo u përplas me një shtyllë dhe pësoi disa trauma, duke u transportuar në gjendje të rëndë në spitalin Cisanello të Pizës.
“Që nga ajo ditë për të gjërat ndryshuan”, tregon motra e saj, Aurora, e cila rrëfen se gjendja shëndetësore e Giulia-s kishte pasur ulje-ngritje që prej aksidentit.
Për shkak të pasojave të aksidentit, Giulia kishte hequr dorë nga skijimi, një prej pasioneve të saj, si dhe kishte ndërprerë punën në kompaninë familjare të bojërave.
Një vajzë e dashur dhe me shumë plane
Giulia punonte në biznesin familjar në Viareggio. Ajo përshkruhet nga familjarët si një vajzë e dashur, e qeshur, bujare dhe shumë e lidhur me njerëzit e saj.
Ajo e donte shumë Viareggion, detin, malet dhe Karnavalin. I pëlqente të lexonte, të mësonte, të gatuante dhe të merrej me modën. Kishte gjithashtu plane për të ardhmen, veçanërisht në fushën e mikpritjes dhe turizmit.
Prindërit e saj, Diana Kadushja dhe Kostandin Stefa, janë me origjinë nga Durrësi. Giulia ishte veçanërisht e lidhur me motrën e saj më të madhe, Aurora.
“Kishim ende kaq shumë gjëra për të jetuar së bashku”
Aurora ka publikuar një dedikim prekës për motrën e saj, duke kujtuar karakterin dhe lidhjen e fortë që kishin.
“Ishe motra ime e vogël, përkëdhelja e shtëpisë, ajo e surprizave, e aftë të mendoje gjithmonë për të tjerët para vetes”, shkruan ajo.
Aurora tregon se Giulia ishte personi me të cilin ishte rritur dhe se të dyja kishin ende shumë plane për të ardhmen.
Mes tyre ishte edhe dasma e Aurorës, të cilën Giulia mezi priste ta organizonte dhe ta shijonte bashkë me motrën e saj. Ajo gjithashtu mezi priste të bëhej teze.
“Për mua nuk ishe vetëm një motër. Ishe bashkëpunëtorja ime, personi me të cilin u rrita, një pjesë e jetës sime dhe e gjithçkaje që jam. Kishim ende kaq shumë gjëra për të jetuar së bashku”, shkruan Aurora.
Në fund, ajo i drejtohet motrës me fjalët: “Do të më mungosh çdo ditë të jetës sime. Të dua, motra ime e vogël. Përgjithmonë ne të dyja”.
Ceremonia e lamtumirës
Ceremonia e lamtumirës për Giulia Stefa do të zhvillohet më 7 tetor, në kishën Santa Rita në Campo d’Aviazione, në Viareggio.
Pas ceremonisë, 24-vjeçarja do të përcillet për në varrezat e Viareggios, ku do të bëhet edhe varrimi.
