TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Senati francez ka miratuar një projektligj që parashikon detyrimin e protestuesve për të paguar deri në 10 mijë euro dëmshpërblim për dëmet e shkaktuara gjatë demonstratave.
Nisma vjen pas protestave të dhunshme që përfshinë Francën gjatë muajit tetor, gjatë të cilave mijëra biznese u dëmtuan ose u grabitën. Projektligji u miratua të mërkurën me 229 vota pro dhe 105 kundër, falë mbështetjes së aleancës së partive të djathta dhe të qendrës, të cilat zotërojnë shumicën në Senat.
Megjithatë, legjislacioni duhet të shqyrtohet dhe të miratohet edhe nga Asambleja Kombëtare franceze, ku forcat politike janë më të përçara, përpara se të mund të hyjë në fuqi.
Projektligji u propozua fillimisht pas trazirave që shpërthyen në maj, pas fitores së Paris Saint-Germain ndaj Arsenalit në finalen e Ligës së Kampionëve. Por nisma mori një rëndësi të re pas protestave të 17 tetorit kundër pabarazisë ekonomike dhe rritjes së çmimeve, të cilat u shoqëruan me përplasje të dhunshme, dëmtime të pronave dhe grabitje të bizneseve.
Sipas projektligjit, përgjegjësia financiare nuk do të kufizohet domosdoshmërisht vetëm te personat që kanë shkaktuar drejtpërdrejt dëmet. Edhe individët për të cilët provohet se kanë marrë pjesë me vetëdije në grupe të krijuara për të kryer akte vandalizmi mund të detyrohen të paguajnë dëmshpërblime.
Një tjetër dispozitë e debatueshme e nismës parashikon mundësinë e sekuestrimit të përfitimeve sociale dhe ndihmës për strehim, me qëllim mbulimin e dëmeve të shkaktuara. Kjo masë ka nxitur kundërshtime nga deputetët e majtë dhe organizatat e të drejtave të njeriut.
Amnesty International ka paralajmëruar se dispozitat e propozuara mund t’i shtyjnë familjet që tashmë janë të margjinalizuara drejt një varfërie edhe më të thellë.
Franca nuk është i vetmi vend europian që po ndërmerr masa më të ashpra ndaj dhunës gjatë protestave. Edhe Italia ka miratuar dispozita të reja sigurie, të cilat parashikojnë dënime nga 4 deri në 12 vite burg për organizimin e grupeve të përfshira në demonstrata të dhunshme.
