TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Presidenti rus, Vladimir Putin, ka bërë një deklaratë gjatë takimit me kryeministrin sllovak Robert Fico në Kinë, ku tha se Moska nuk e ka kundërshtuar kurrë anëtarësimin e Ukrainës në Bashkimin Evropian.
“Sa i përket anëtarësimit të Ukrainës në BE, ne kurrë nuk e kemi kundërshtuar”, tha Putin, duke shtuar se për NATO-n qëndrimi i Rusisë është krejt tjetër. “Kjo është çështje tjetër. Qëndrimi ynë për këtë është i njohur: ne e konsiderojmë të papranueshme”, theksoi ai.
Deklaratat e liderit të Kremlinit vijnë në një kohë kur tensionet me Perëndimin vijojnë të jenë të larta, ndërsa lufta në Ukrainë ka hyrë në vitin e katërt, shkruan Reuters.
Putin pretendoi se ndërhyrja në Ukrainë erdhi si pasojë e, sipas tij, përpjekjeve të Perëndimit për të “përvetësuar gjithë hapësirën post-sovjetike” përmes zgjerimit të NATO-s.
Ndërkohë, presidenti amerikan Donald Trump, pas takimit që zhvilloi me Putinin muajin e kaluar në Alaskë, u shpreh se “Putini është i lodhur nga lufta”, por shtoi se “mbetet të shihet nëse do të arrihet paqja”.
Nga ana tjetër, udhëheqësit e Ukrainës dhe vendeve të Evropës Perëndimore janë skeptikë ndaj sinqeritetit të Moskës. Ata paralajmërojnë se një fitore e Rusisë në Ukrainë mund të çojë në kërcënim të drejtpërdrejtë për NATO-n dhe vendet evropiane.
Putin i hodhi poshtë këto paralajmërime, duke i quajtur “histeri” nga njerëz të papërgjegjshëm që, sipas tij, po paraqesin Rusinë si një kërcënim global.
