TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Nënkryetari i LSI-së, Petrit Vasili tha sot se mungesa e një strategjie nga ana e qeverisë, bëri të pamundurën që të ndërtohet kurba e pandemisë, për të kuptuar se kur ishte maksimumi i pandemisë dhe kur fillonte dalja prej saj.
“Sot Shqipëria në mënyrën më skandaloze dhe më të turpshme ka raste 3-4 herë më shumë se sa në momentin e pikut, pra të maksimumit të vet. Çdo vend europian, duke filluar nga Italia, në momentin e vendosjes së hapjes, relaksimit, daljes nga pandemia, rastet filluan të uleshin. Në Shqipëri ndodh e kundërta.
Pikërisht ku rastet fillojnë të shtohen menjëherë kur fillon hapja. Arsyeja është mungesa e testimeve dhe mungesa e aktivizimit të mjekëve të familjes në terren u bënë qëllimisht për të mos evidentuar të vërtetën, e gjithë problematika u grumbullua vetëm në një numër 127 për t’iu larguar të vërtetës me qëllimin e lig që ne do bëjmë sikur testojmë, do fshehim shifrat dhe pastaj ishalla pandemia bie vetë dhe ne duartrokasim fort për një sukses të jashtëzakonshëm politik”, akuzoi Vasili.
Sipas nënkryetarit të LSI, Rama ka përdorur politikisht pandeminë dhe kjo ka sjellë një ndikim të madh në ekonominë e vendit.
“Njëherazi këto kufizime i kanë dhënë një goditje vdekjeprurëse ekonomisë shqiptare.
Sot sipas studimeve tërësisht të besueshme 47% e bizneseve kanë ulur qepenat, janë mbyllur.
42% e tyre vazhduan punë sërish dhe 32% e tyre pra më shumë se një e treta kanë shkurtuar personelin pra një dramë e tmerrshme që po bie në kurrizin e mijëra shqiptarëve“.
Duke komentuar paralajmërimin e kryeministrit Rama se mund të ketë një rimbyllje nëse situata përkeqësohet, Vasili thekson se shefi i qeverise “nuk mund të flasë më për kufizime dhe izolime të shqiptarëve, aq më pak për pandeminë”.
“Shqiptarët janë dëshmitarë që dhunuesi më i madh i rregullave të pandemisë, ai që duhet të ishte para drejtësisë nëse SPAK-u një ditë të vetme do të ngrihej nga gjumi dhe do të çlirohej nga kapja, pasi urdhëroi prishjen e teatrit ku mijëra policë ngjeshur sup më sup po luftonin kundra qytetarëve dhe këta policë ishin njerëz, ishin qytetarë, kishin potencial për përhapjen e pandemisë njëlloj si të tjerët apo aktivitete të tjera që i pëlqejnë atij dhe Bashkisë Tiranë ku grumbullohen mijëra qytetarë e ndërkohë këta marrin zvarrë një qytetar të vetëm se gjoja paska thyer rregullat e pandemisë.
Të gjithë shqiptarët e kuptojnë më së miri këtë sjellje të zezë të këtij kryeministri dhe natyrshëm janë të detyruar ta refuzojnë e të mos pranojnë më asnjë urdhër asnjë vendim që vjen prej dorë së këtij njeriu. Ora e tij ka mbaruar”, u shpreh Vasili.
