TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Rezidenca milionëshe e aktorit të njohur Brad Pitt në lagjen ekskluzive të Los Feliz, Los Angeles, është bërë shënjestër e një grabitjeje.
Policia e Los Angeles-it (LAPD) ka konfirmuar se ngjarja ndodhi rreth orës 22:30 të mbrëmjes së së mërkurës, ku tre persona dyshohet se kanë kaluar gardhin rrethues të një prone në këtë zonë dhe kanë hyrë nëpërmjet një dritareje në pjesën e përparme. Ata janë larguar me sende të paidentifikuara dhe në sasi të papërcaktuar.
Ndërkohë që autoritetet nuk e konfirmuan zyrtarisht identitetin e pronarit, burime të ndryshme mediatike bëjnë me dije se bëhet fjalë për shtëpinë 5.5 milionë dollarëshe të yllit të filmit “F1”. Aktori 61-vjeçar nuk ndodhej në banesë në momentin e ngjarjes, pasi është duke marrë pjesë në turin promovues të filmit të tij të ri, me ndalesa në Londër, Meksikë dhe New York.
Sipas mediave, Pitt e bleu këtë pronë në prill 2023 nga trashëgimtarja e pasurisë së naftës, Aileen Getty, e cila nga ana tjetër bleu rezidencën e mëparshme të aktorit për 33 milionë dollarë.
Hetimet për zbardhjen e ngjarjes janë ende në vijim.
