BOTA, 2 Shkurt 2023, 09:44

Vijojnë tensionet, Izraeli kryen sulme ajrore në Rripin e Gazës

Vijojnë tensionet, Izraeli kryen sulme ajrore në Rripin e Gazës

Izraeli ka nisur sulmet ajrore në Rripin e Gazës gjatë natës, disa orë pasi forcat e tij të armatosura thanë se kishin kapur një raketë të lëshuar nga enklava palestineze.

Disa raketa të tjera palestineze u hodhën pas sulmeve izraelite dhe rreth orës 03:15 u dëgjuan shpërthime të reja dhe motorë avionësh në qytetin e Gazës.  Në një deklaratë të lëshuar në orën 02:41, ushtria izraelite konfirmoi se po zhvilloheshin sulme në Rripin e Gazës.

Sipas burimeve pranë forcave lokale të sigurisë palestineze dhe dëshmitarëve okularë, sulmet e para  ishin të paktën shtatë dhe  kishin në shënjestër një qendër trajnimi të Brigadave Ezzedine al-Qassam (krahu i armatosur i grupit islamik Hamas) në kampin e refugjatëve Al Maghazi në zonën qendrore të Rripit të Gazës.

Një gazetar i AFP-së pa dy raketa të tjera të lëshuara në drejtim të Izraelit pas sulmeve ajrore izraelite, ndërsa dëshmitarët okularë thanë se disa të tjera u lëshuan nga zona të ndryshme të enklavës së vogël bregdetare prej 2.3 milionë banorësh, nën bllokadë izraelite pasi i mori pushtetin nga Hamasi në 2007.

Fronti Popullor për Çlirimin e Palestinës (FPLP), një organizatë e armatosur e së majtës palestineze, foli ndër të tjera për “lëshimin e një breshëri raketash” në shenjë hakmarrjeje për “sulmin në Rripin e Gazës”.

Në Izrael, u dëgjuan sirenat e mbrojtjes ajrore në Sderot, një qytet në pjesën jugore të vendit, pak larg nga Rripi i Gazës.

Sipas burimeve pranë forcave lokale të sigurisë, seria e dytë e sulmeve ajrore izraelite shënjestroi një qendër trajnimi të Brigadave Ezzedine al-Qassam në sektorin jugperëndimor të qytetit të Gazës.

Në këtë fazë nuk raportohet për viktima nga të dyja palët.