TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Që prej hyrjes në fuqi të armëpushimit, trafiku në Ngushticën e Hormuzit vazhdon të mbetet shumë i kufizuar.
Sipas të dhënave të kompanisë “Kpler”, vetëm 16 anije që transportojnë lëndë të para kanë kaluar në këtë korridor strategjik. Prej tyre, 10 kishin lidhje me Iranin, duke mbërritur ose duke u nisur drejt tij, duke ruajtur një raport të ngjashëm me periudhën para armëpushimit, rreth 60%.
Me një mesatare prej rreth tetë anijesh në ditë, numri i kalimeve mbetet afërsisht në nivele të ngjashme me periudhën para armëpushimit. Megjithatë, sipas analizave të “Lloyd’s List Intelligence”, trafiku është ende rreth 90% më i ulët se normalja dhe mbështetet kryesisht nga lëvizjet tregtare iraniane.
Analistja Bridget Diakun thekson se situata mbetet e brishtë, ndërsa Ana Subasic nga “Kpler” parashikon që kalimet mund të stabilizohen në 10–15 anije në ditë, nëse armëpushimi respektohet.
Të dhënat tregojnë se nga 1 marsi deri më 9 prill janë regjistruar 328 kalime anijesh që transportojnë lëndë të para, ku 208 prej tyre ishin cisterna nafte ose transportues gazi, kryesisht të drejtuara drejt lindjes, në drejtim të Gjirit të Omanit.
Ndërkohë, rreth 800 anije kanë mbetur të bllokuara në Gji që nga fundi i shkurtit, sipas “Lloyd’s List”, prej të cilave rreth 600 janë anije mallrash të përmasave mesatare dhe të mëdha.
Në total, sipas “Kpler”, rreth 172 milionë fuçi nafte bruto dhe produkte të rafinuara ndodheshin në det në Gji më 7 prill, të shpërndara në rreth 187 cisterna. Po ashtu, në zonë ndodhen edhe rreth 40 anije me plehra kimike dhe 15 anije me gaz natyror të lëngshëm (GNL).
Një prej tyre, anija “Prix”, që transporton 25 mijë ton pleh të ngurtë drejt Tanzanisë, pritet të kalojë ngushticën. Nëse kjo ndodh, do të ishte vetëm ngarkesa e shtatë e plehrave që largohet nga Gjiri përmes detit që nga fillimi i konfliktit.
