TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Tre civilë janë vrarë sot nga një sulm rus në rajonin juglindor Zaporizhja, teksa Rusia vazhdoi sulmet ajrore dhe të artilerisë ndaj qyteteve dhe fshatrave ukrainase, njoftuan zyrtarët lokalë.
“Dy burra dhe një grua vdiqën nën gërmadhat e shtëpisë së tyre, e cila u godit nga një predhë ruse”, tha guvernatori lokal, Ivan Fedorov, në Telegram.
Federov tha se një person tjetër u plagos kur forcat ruse e bombarduan qytetin me raketahedhës.
Shtabi i Përgjithshëm i Ukrainës tha se Rusia kreu 88 sulme ajrore gjatë natës, duke lëshuar 17 dronë Shahed dhe 10 raketa.
Kundërajrorët ukrainas i shkatërruan të gjithë 17 dronët rusë, sipas ushtrisë ukrainase. Dronët u rrëzuan në rajonet Dnipropetrovsk, Harkiv dhe Poltava.
Më shumë se 100 fshatra ukrainase u përballën me zjarrin e artilerisë ruse në rajonet ukrainase Çernihiv, Donjeck, Dnipropetrovsk, Harkiv, Herson, Luhansk, Mikolaiv dhe Zaporizhja, sipas Shtabit të Përgjithshëm.
Ushtria, ndërkohë, theksoi se 57 luftime u zhvilluan mes trupave ukrainase dhe forcave pushtuese ruse në ditën e fundit.
Ukraina i zmbrapsi 26 sulme ruse në rajonet lindore Donjeck dhe Luhansk, si dhe kreu sulme ndaj pozicioneve ruse në 11 zona, duke u shkaktuar atyre “humbje në ushtarë dhe pajisje”, tha ushtria./REL
