TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Sekretari amerikan i Shtetit, Marco Rubio ka bërë një ndalesë në Armeni gjatë kthimit të tij nga India, ku u takua me ministrin e Punëve të Jashtme, Ararat Mirzoyan dhe nënshkroi një memorandum për bashkëpunim strategjik.
Sipas vëzhguesve politikë, kjo është vizita e parë e një sekretari amerikan të Shtetit në Armeni, që nga viti 2014 dhe shihet si një përpjekje për të forcuar rolin e Uashingtonit në rajonin e Kaukazit Jugor.
Në një konferencë të përbashkët për shtyp, Mirzoyan vlerësoi marrëdhëniet dypalëshe dhe ndërmjetësimin e SHBA-së nën drejtimin e presidentit, Donald Trump në konfliktin e Armenisë me Azerbajxhanin fqinj.
Si pjesë e përpjekjeve për zgjidhjen e konfliktit, Uashingtoni ka propozuar krijimin e një korridori rrugor dhe hekurudhor përmes territorit të Armenisë, i cili do të lidhte dy pjesë të Azerbajxhanit dhe do të kishte gjithashtu përfitime ekonomike për SHBA-në.
Projekti mban emrin “Rruga Trump për Paqe dhe Prosperitet Ndërkombëtar” (TRIPP)”.
Jerevani, i cili tradicionalisht ka mbajtur marrëdhënie të mira me Moskën dhe Teheranin, ka orientuar gjithnjë e më shumë politikën e tij drejt Perëndimit, nën drejtimin e kryeministrit Nikol Pashinyan.
Marrëdhëniet me Rusinë janë ftohur ndjeshëm, ndërsa para zgjedhjeve parlamentare në Armeni më 7 qershor, Moska vendosi kufizime importi për një sërë produktesh armene.
Nga ana tjetër, SHBA-ja, e përfshirë në tensione me Iranin prej disa muajsh, po kërkon të rrisë ndikimin e saj në vendet fqinje të këtij shteti.
