TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Një numër gjithnjë e në rritje i të miturve shfaqen në dosjet e çështjeve terroriste të lidhura me ideologjinë xhihadiste në Belgjikë, sipas raportit të fundit vjetor të Sigurisë së Shtetit, i cili u publikua dje.
Në vendin, i cili është gati të përkujtojë këtë vit 10-vjetorin e sulmeve xhihadiste në Bruksel (32 të vdekur në mars 2016), të cilat u kryen nga e njëjta qelizë si ato në Paris në nëntor 2015, kjo ideologji është ende e pranishme dhe vazhdon të frymëzojë plane sulmesh, megjithëse këto të fundit duket se janë më pak të “përpunuara”.
“Kërcënimi terrorist i frymëzuar nga salafistët dhe xhihadistët vazhdon të jetë kërcënimi numër një për sa i përket terrorizmit” në Belgjikë, thuhet në raport.
Ky kërcënim prek 80% të dosjeve të përpiluara nga autoritetet në kuadër të një sistemi kombëtar të ndarjes së informacionit mbi ekstremizmin dhe terrorizmin, nënvizohet në të.
Vitin e kaluar, individët e identifikuar si të lidhur me propagandën xhihadiste si Shteti Islamik ose Al-Kaeda ishin “shpesh të rinj, madje shumë të rinj”, me një moshë mesatare prej 22 vjeç, ndërsa “më i riu ishte 12 vjeç”, vazhdon ky shërbim inteligjence.
Raporti nuk specifikon se çfarë veprimesh ligjore u ndërmorën në rastin e këtij djali 12-vjeçar, i cili konsiderohej kërcënim.
“Është e qartë se ne jemi veçanërisht të kujdesshëm kur një dosje ka të bëjë me një të mitur” dhe sapo identifikohen këta të dyshuar, “ne sigurisht që i drejtohemi autoriteteve kompetente, për shembull zyrës së prokurorit për të mitur”, tha shefja e Sigurisë së Shtetit, Francisca Bostin, duke folur për stacionin publik belg RTBF në gjuhën frënge.
Planet për veprime të dhunshme në vitin 2025 kishin të bënin me “një numër në rritje të të miturve”, të cilët përbënin “rreth një të tretën” e të dyshuarve, tha gjithashtu Siguria e Shtetit. Por këta adoleshentë “kishin, në shumicën dërrmuese të rasteve, një plan që ishte vetëm pak i avancuar, ishte pak i përpunuar ose i vështirë për t’u zbatuar”, shtoi raporti.
“Sot nuk presim më sulme aq të organizuara sa ato që pamë në vitin 2016”, tha Bosten. Ajo tha se autoritetet janë më të shqetësuara për aktet e izoluara ose ato të “grupeve të vogla që shpesh lidhen me aktivitete online”.
