TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Ish-Prokurorja e Përgjithshme e SHBA-së, Pam Bondi, është diagnostikuar me kancer të tiroides pak kohë pas largimit të saj nga Departamenti i Drejtësisë muajin e kaluar, sipas një raportimi të publikuar nga Axios.
Lajmi është ripostuar në platformën X nga Katie Miller, ish-bashkëpunëtore e Shtëpisë së Bardhë dhe prezantuese podcast-i, e cila ka bërë të ditur se Bondi po përballet në heshtje me sëmundjen gjatë javëve të fundit dhe se “po e mposht atë”. Miller e përshkroi gjithashtu Bondin si një person “me zemër të artë”.
Sipas burimeve të cituara, 60-vjeçarja ka kaluar trajtim mjekësor dhe aktualisht ndodhet në fazë rikuperimi, ndërsa paralelisht po angazhohet në një rol të ri këshillimor në administratën e presidentit Donald Trump, me fokus në politikat për inteligjencën artificiale.
Axios raporton se Bondi pritet të jetë pjesë e Këshillit Presidencial të Këshilltarëve për Shkencën dhe Teknologjinë, një strukturë që merret me zhvillimin e politikave në fushën e inteligjencës artificiale. Ky këshill drejtohet nga David Sacks dhe Michael Kratsios, figura të larta këshillimore në Shtëpinë e Bardhë.
Ky zhvillim vjen vetëm pak javë pas largimit të saj nga posti i Prokurores së Përgjithshme, vendim i marrë nga Donald Trump. Në një reagim të mëhershëm, Trump e kishte cilësuar Bondin si “patriote të madhe amerikane dhe mike besnike”.
Pas largimit të saj, detyrat e Prokurorit të Përgjithshëm në detyrë janë marrë nga zëvendësi Todd Blanche.
Në postimin e saj të lamtumirës në X, Bondi kishte deklaruar se mbetet “përjetësisht mirënjohëse” për besimin e treguar nga Trump dhe kishte theksuar se do të vijojë angazhimin e saj profesional si në sektorin publik ashtu edhe në atë privat.
