TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Gjermania po kërkon të forcojë sigurinë e saj energjetike përmes një partneriteti strategjik me Arabinë Saudite. Ministrja gjermane e Ekonomisë, Katherina Reiche, udhëtoi sot drejt Riadit, ku synon të finalizojë një marrëveshje energjetike që pritet të thellojë marrëdhëniet dypalëshe mes dy vendeve.
Sipas ministres, partneriteti i planifikuar do të përfshijë blerjen e produkteve të naftës dhe gazit, si dhe investime të përbashkëta në energjitë e rinovueshme. Reiche theksoi se në fokus të bashkëpunimit do të jenë gjithashtu teknologjitë e magazinimit të energjisë dhe hidrogjeni i qëndrueshëm.
Ministrja gjermane shoqërohet në këtë vizitë nga një delegacion i gjerë prej 35 kompanish dhe 11 startup-esh, që operojnë si në sektorin e energjisë konvencionale, ashtu edhe në atë të gjelbër.
Vizita zhvillohet në një moment kur Arabia Saudite, megjithëse një nga prodhuesit më të mëdhenj të naftës në botë, po investon gjithnjë e më shumë në dekarbonizim dhe tranzicion energjetik.
Qëndrimi i Reiche në Arabinë Saudite, i cili pritet të zgjasë deri të martën, pasqyron edhe përpjekjet e Gjermanisë për të diversifikuar partneritetet ndërkombëtare, në një klimë të shtuar pasigurie gjeopolitike.
“Kur partneritetet mbi të cilat jemi mbështetur për dekada fillojnë të bëhen më të brishta, duhet të kërkojmë partnerë të rinj”, deklaroi Reiche, duke iu referuar tensioneve në marrëdhëniet transatlantike pas rikthimit të presidentit amerikan Donald Trump në detyrë.
Ajo shtoi se, si një vend me orientim të fortë eksporti, Gjermania duhet të zgjerojë bazën e saj të bashkëpunimeve strategjike.
