TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Shtëpia e Bardhë ka bërë të qartë se Libani nuk është pjesë e marrëveshjes së fundit të armëpushimit me Iranin, ndërsa ka përcjellë edhe një mesazh të presidentit Donald Trump, i cili ka ashpërsuar tonet ndaj NATO-s.
Zëdhënësja e Shtëpisë së Bardhë, Karoline Leavitt, deklaroi se Libani nuk është përfshirë në marrëveshjen e arritur një ditë më parë, duke theksuar se ky qëndrim u është komunikuar të gjitha palëve të përfshira.
“Libani nuk është pjesë e armëpushimit”, u shpreh ajo, duke iu referuar edhe qëndrimit të kryeministrit izraelit Benjamin Netanyahu, i cili ka nënvizuar se Izraeli ka ende objektiva për të realizuar.
E pyetur nëse Uashingtoni do të dëshironte përfshirjen e Libanit në marrëveshje, Leavitt tha se kjo mbetet një çështje e hapur për diskutim, por aktualisht nuk është pjesë e armëpushimit.
Në një zhvillim tjetër, ajo përcolli edhe një deklaratë të Trump lidhur me marrëdhëniet me NATO-n, ku presidenti amerikan kritikoi aleancën për qëndrimin e saj të fundit.
“Është mjaft e trishtueshme që NATO i ktheu shpinën popullit amerikan gjatë gjashtë javëve të fundit. Është populli amerikan që ka financuar mbrojtjen e saj”, citoi Leavitt fjalët e Trump.
Sipas Shtëpisë së Bardhë, Trump pritet të zhvillojë një takim në Uashington me sekretarin e përgjithshëm të NATO-s, Mark Rutte, ku do të diskutohet drejtpërdrejt për marrëdhëniet brenda aleancës dhe sfidat aktuale të sigurisë.
