TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Autoritetet në Turqi arrestuan të mërkurën 19 aktorë, influencues dhe këngëtarë në një hetim për një rrjet droge. Midis atyre që u çuan në pranga në godinën e Xhandarmërisë në Stamboll ishte edhe Hadise Açıkgöz, e cila përfaqësoi Turqinë në Festivalin e Këngës në Eurovizion në vitin 2016 me këngën Düm Tek Tek.
Pasi doli nga selia e xhandarmërisë, Hadise bëri një postim të çuditshëm në Instagram, duke shkruar: "Jam po aq e hutuar sa ju". Ndërsa më pas ajo publikoi imazhe nga një koncert që dha në Ankara.
Në mesin e personave të thirrur për t'u marrë në pyetje ishin edhe aktorët Demet Evgar, Özge Özpirincci, Mert Yazıcıoğlu, Kaan Yıldırım, Kubilay Aka, Berrak Tüzünataç dhe Meriç Aral, këngëtarët Hadise Açıkgöz dhe İrem Derici, si dhe çifti i influencuesve Ölans dhe İrem Derici.
Avokatja e Dilan Polat, Sevinç Horoz, tha se klientja e saj i ishte nënshtruar më parë analizave që konfirmuan se ajo nuk kishte përdorur drogë. "Nëse kjo konsiderohet e pamjaftueshme, ne jemi të gatshëm t'i nënshtrohemi një ekzaminimi të ri. Është e pamundur të kuptohet se çfarë ka ndodhur."
Polatët, të cilët kanë ndërtuar një biznes bukurie me vlerë shumë milionë dollarë, kanë pasur probleme me ligjin gjatë dy viteve të fundit. Ata u arrestuan marsin e kaluar me akuzën e posedimit të drogës dhe po përballen me gjyqin për akuzat e pastrimit të parave dhe evazionit fiskal.
Hetimi po kryhet nga Zyra e Kontrabandës, Narkotikëve dhe Krimeve Ekonomike e Prokurorisë së Stambollit, me autoritetet që thonë se hetimi është përqendruar në përcaktimin nëse të dyshuarit po përdornin drogë dhe nëse përdorimi i tyre shkel ligjin turk.
19 emra të showbiz-it turk akuzohen për drogë, mes tyre edhe yjet e serialeve
Turqia ka hapur një hetim për përdorim droge duke shënjestruar një mori personazhesh të famshëm.
Në hetimin e Byrosë së Krimeve të Narkotikëve, 19 persona, përfshirë Metin Akdülger (i njohur për rolin e tij në serialin “Sulltanesha Kösem”), Birce Akalay (seriali “Babil”) apo Berrak Tüzünataç (në serialet “Ezel” dhe “Sulejmani i madhërishëm”) janë marrë në pyetje dhe u janë marrë kampionët e gjakut.
Yje të muzikës, televizionit dhe të rrjeteve sociale kanë mohuar akuzat përmes avokatëve të tyre. Nuk janë ngritur akuza zyrtare. Ngjarja ka shokuar industrinë e argëtimit në Turqi, ku konteksti i gjerë janë shqetësimet në vend për lirinë e fjalës.
Emra të tjerë të përfshirë janë: Dilan Polat, Engin Polat, İrem Derici, Kubilay Aka, Kaan Yıldırım, Hadise Açıkgöz, Duygu Özaslan Mutaf, Demet Evgar Babataş, Zeynep Meriç Aral Keskin, Özge Özpirinçci, Mert Yazıcıoğlu, Feyza Altun, Derin Talu, Deren Talu, Ziynet Sali dhe Ceren Moray Orcan.
Sipas ligjit turk, posedimi i drogës për përdorim personal dënohet deri në pesë vite burg. Megjithatë, gjykata mund të kërkojë trajtim ose ndalim për ata që e shkelin ligjin për herë të parë duke shmangur dënimin.
Kundërshtarët e presidentit Recep Tayyip Erdogan thonë se muajt e fundit janë shënjestruar figurat artistike, mediatike dhe opozitare.
Javën e shkuar, gazetari Fatih Altaylı doli para gjyqit me akuzën për “kërcënime” ndaj Erdogan. Gazetari i mohon akuzat dhe mund të dënohet deri në pesë vite burg.
Në shtator, u hap një hetim ndaj këngëtarit Mabel Matiz për “paturpësi” në këngët e tij. Ai mund të përballet me tre vite burg. Më pas, prokurorët thanë se do të kërkojnë dënim me një vit burg për grupin Manifest për “sjellje të papërshtatshme” në koreografitë e tyre.
Në mars, në vend shpërthyen protestat pas arrestimit të kryetarit të bashkisë së Stambollit, Ekrem Imamoglu, vetëm pak ditë para se ai të zgjidhej si kandidat presidencial për zgjedhjet e vitit 2028. Imamoglu shihet si një prej kundërshtarëve më të fortë politikë të Erdogan. Qeveria e këtij të fundit i mohon akuzat.
