TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Shqipëria është zgjedhur me votë unanime si Presidente e Forest Europe për periudhën 2026-2030, për politikëbërjen në fushën e pyjeve. Me votën e 45 vendeve anëtare, vendi merr stafetën nga Suedia, bën me dije kryeministri Rama përmes një postimi në rrjetet sociale.
Me këtë presidencë, Shqipëria do të drejtojë axhendën politike dhe organizimin ministerial lidhur me diskutimet për sektorin e pyjeve.
Kryeministri e ka shfrytëzuar këtë moment edhe për të ironizuar kritikët kundër resortit në Zvërnec. Ai bën pyetje sesi ka mundësi që “Shqipëria e tradhtarëve” nderohet në Europë. Më tej shton se “u prish dynjaja” për bashkimin Trump-Soros që do të zëvendësojë pelikanët me palestinezë në një ishull izraelit që do të ketë partneritet me Katarin.
Rama shton se për gjithë këtë, “tradhtari” gjendet në kryeministri ndërsa përdor edhe frazat fyese të një protestuesi.
“Përsëri Shqipëria nderohet në Europë.
Çudi e madhe ëëë…
Shqipëria e tradhtarëve sapo u zgjodh me votë unanime të 45 vendeve anëtare, si Presidente e Forest Europe (Europa e Pyjeve) për periudhën 2026–2030, duke marrë stafetën nga Suedia.
Po si ka mundësi, që këtë vend të betonit, Paketës së Mafias së Maleve dhe të Konspiracionit Jahudit të zhdukjes së pyllit të Zvërnecit për ta kthyer në geto palestinezësh të spastruar etnikisht nga Gaza, ta mbështesin fuqimisht Gjermania dhe Mbretëria e Bashkuar për këtë zgjedhje kaq domethënëse, ndërsa vendimi të miratohet më në fund pa asnjë kundërshtim, nga asnjë vend anëtar?!
Forest Europe është platforma më e rëndësishme pan-evropiane për politikëbërjen në fushën e pyjeve, që bashkon 45 shtete evropiane dhe Bashkimin Evropian për të përcaktuar drejtimet strategjike të menaxhimit të qëndrueshëm të pyjeve, biodiversitetit pyjor, klimës dhe ekonomisë së gjelbër.
Iku kjo botë, madje u prish dynjaja, se u bashkuan në Shqipëri Trumpi me Sorosin që të bëjnë “Shqipërinë e shqiptarëve” me hormone transgjenitale, me një ishull izraelit në tokë e një në det, me zëvendësim të pelikanëve me palestinezë, ku kulmi i degjenerimit është partneriteti i tyre me Katarin, që në Zvërnec do vihet në shërbim të Izraelit paçka se në Gjirin Arabik nuk e shohin me sy njëri-tjetrin… Dhe kush i bën të tëra këto, tradhtari në kryeministri që ku t’i ketë robt e shpis o ej, o ej, o ej, se paska qenë Satanai vetë.
Deri në vitin 2030, Shqipëria do të drejtojë agjendën politike dhe procesin ministerial të kësaj organizate, duke koordinuar diskutimet dhe prioritetet evropiane për sektorin e pyjeve, e duke u rritur në kompetenca e në reputacion përmes kësaj eksperience fantastike.
Ky është një tjetër sukses i rëndësishëm diplomatik, që e forcon më tej profilin ndërkombëtar të vendit dhe rrit rolin e Shqipërisë në diplomacinë mjedisore, duan s’duan ata që s’duan, qofshin ata të “Shqipërisë së shqiptarëve”, e qofshin ata që i përdorin si kukulla të pavetëdijshme, duke ua bërë flakë TikTokun me raketat e luftës hibride të manipulimeve online”, shkruan Rama.
