TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Ish-deputeti Ervin Salianji ka zhvilluar një takim me mbështetës dhe demokratë në qytetin e Peshkopisë, ku ka artikuluar kritika të forta ndaj drejtimit aktual të Partisë Demokratike dhe deklaratave të kreut të saj, Sali Berisha, kundër ambasadorit të Bashkimit Europian në Tiranë.
Gjatë fjalës së tij, Salianji tha se Partia Demokratike nuk mund të ecë përpara duke u mbyllur dhe duke sulmuar aleatët ndërkombëtarë.
“Gara është nëpër sheshe, nëpër salla, demokratët janë në këmbë. PD nuk mposhtet, nuk uzurpohet dhe nuk ecën dot mbrapsht”, deklaroi ai.
“Dua t’u përgjigjem atyre që thonë a ke figura që të mbështesin, më i votuari i Tiranës, Elbasanit, Kukësit, Durrësit, Shkodrës. Figura janë ata që përzgjedhin demokratët, jo një lidership që ka uzurpuar PD për interesa personale”, tha ai.
Salianji u shpreh se prej pesë muajsh ka zhvilluar takime në të gjithë Shqipërinë me demokratë dhe qytetarë, duke theksuar se ndryshimi në PD është e vetmja rrugë për ta sjellë partinë sërish në pushtet.
“PD është ende e vetmja forcë që mund të sjellë ndryshimin, por ajo duhet të hapet, të ndryshojë dhe të kthehet te vlerat themeluese”, tha ish-deputeti.
Ai komentoi edhe reagimin e ambasadorëve të Bashkimit Europian pas deklaratave të Berishës ndaj ambasadorit të BE-së në Tiranë, duke u distancuar nga ato qëndrime.
“PD nuk duhet të jetë frëngji ku gjuhen ambasadorët, siç ndodhi sot që BE reagoi më vete. Qëndrimi nuk ishte i PD-së, por i një njeriu që e ka uzurpuar dhe e mban peng Partinë Demokratike”, u shpreh Salianji.
Më tej, ai theksoi se demokratët duhet të jenë ata që zgjedhin figurat përfaqësuese të partisë dhe jo, sipas tij, një lidership i fokusuar në interesa personale.
“Nuk fitohet duke sulmuar të gjithë, por duke bashkuar dhe ndërtuar partneritet. Vetëm duke bërë këtë kapërcim cilësor, PD mund të hapet dhe të fitojë”, deklaroi Salianji nga Peshkopia.
Gjatë fjalës së tij, Salianji deklaroi se PD duhet të frymëzojë qytetarët dhe të rikthejë mobilizimin masiv të elektoratit.
“Ne duhet të frymëzojmë ndryshimin dhe të çojmë mbi 800 mijë votues në kutitë e votimit. PD duhet të ndryshojë”, tha ai.
Salianji u shpreh se takimet në të gjithë Shqipërinë synojnë ndërtimin e një Partie Demokratike që, sipas tij, mund të mobilizojë një shumicë qytetarësh dhe të rikthejë “epërsinë morale” me të cilën demokratët kanë ardhur më parë në pushtet.
“Këtë gjë e shohim edhe sot në këtë sallë të Dibrës, herën tjetër do ta bëjmë takimin në stadium”, deklaroi ai, ndërsa falënderoi demokratët e Dibrës, Durrësit, Elbasanit, Gjirokastrës, Beratit dhe Shkodrës për mbështetjen.
Ish-deputeti paralajmëroi se lëvizja e nisur prej tij do të shtrihet edhe në kryeqytet.
“Tirana po pret, nuk e kemi lënë për në fund. Ata që bëjnë zgjedhjet e degëve në Tiranë fshehurazi, do ta shkundim edhe Tiranën”, u shpreh Salianji.
Ai e cilësoi këtë si një lëvizje të paprecedentë në historinë e Partisë Demokratike, duke theksuar se për herë të parë po sfidohet kryetari në detyrë me një mbështetje të tillë nga baza demokrate.
“Nuk kemi parë kurrë në historinë e PD të sfidohet kryetari në detyrë dhe të ketë këtë mbështetje nga demokratët”, tha ai.
Në fund, Salianji deklaroi se ai dhe mbështetësit e tij nuk do të tërhiqen përballë presioneve dhe sulmeve politike.
“Nuk kemi ofenduar askënd, kemi dashur të mos përçajmë, por kemi marrë fyerje, shantazh dhe linçim. Po e them edhe nga Dibra, mua dhe mbështetësit e mi as nuk na trembin, as nuk na shantazhojnë. Nuk zmbrapsemi, me ne u ka ngecur sharra në gozhdë”, deklaroi Salianji.
Gjatë takimit, fjalën e mori anëtari i Kryesisë së FRPD, Arbër Kola, i cili u shpreh se PD ndodhet në një situatë të vështirë dhe larg mbështetjes që ka pasur dikur nga elektorati.
“Sot jemi përballë një udhëkryqi. PD është në një situatë e cila po lëngon. Jemi në një situatë ku asnjë përqind e atyre që na kanë votuar nuk e ndjekin PD në protestat e saj”, deklaroi ai.
Kola kritikoi gjithashtu retorikën e përdorur nga drejtuesit demokratë ndër vite, duke thënë se sloganet politike nuk janë shoqëruar me veprime konkrete kundër qeverisë.
“Frazat si ‘kilometri i fundit’ apo ‘i kemi kallur datën Edi Ramës’ nuk qëndrojnë më, sepse janë përsëritur disa herë dhe nuk ka pasur asnjë veprim konkret kundër Edi Ramës”, u shpreh ai.
Në fjalën e tij, anëtari i FRPD-së vlerësoi ish-deputetin Ervin Salianji, duke deklaruar se ai “i ka dalë në ballë këtij regjimi”.
“Më lejoni të falënderoj zotin Ervin Salianji, sepse të vetmit që mund të bëjnë ndryshimin jemi rinia”, tha Kola gjatë takimit në Peshkopi.
