TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Policia greke ka publikuar pamjet e 320 kilogramëve kokaine të sekuestruar në portin e Pireut që vinte me kontejner të mbushur me karkaleca nga Amerika e Latine dhe destinacion kishte Shqipërinë.
Siç shihet nga pamjet mbi kokainë ishte stampuar një kafkë, me mjekër, ndërsa në një tjetër logoja e “Spartës”.
Policia greke ka arrestuar tre shqiptarë J. M., 54 vjeç, A. M., 45 vjeç, M. S., 36 vjeç dhe greku I. B., 64 vjeç.
Sipas policisë, vlera e lëndës narkotike i kalonte shifrat e 5 milionë eurove.
Si vepronte grupi kriminal?
Mediat greke raportojnë se anëtarët e bandës ishin aktivë në trafikun e sasive të konsiderueshme të kokainës nga Amerika Latine.
Droga transportohej në rrugë detare dhe fshihej në kontejnerë për importimin dhe trafikimin e mëtejshëm të saj në vendet evropiane, përfshirë Greqinë, për të përfituar shuma të mëdha fitimesh të paligjshme.
Po vijojnë hetimet për zbardhjen e plotë të veprimtarisë së paligjshme të organizatës kriminale dhe çdo lidhje që mund të ketë me rrjete të tjera të ngjashme, si dhe identifikimin e anëtarëve të tjerë.
Të arrestuarit
J. M., rezulton i shpallur në kërkim nga policia greke prej marsit 2017, si financues dhe organizator i një laboratori të drogave sintetike Captagon, ku gjatë një operacioni të policisë u sekuestruan 634 mije e 246 tableta si edhe u arrestuan disa persona mes të cilëve kunati i tij.
Gjithashtu ai përdor dhe identitetet si A. M., dhe A. M., ndërsa rezulton se ka përdorur më parë pasaportë serbe.
J. M., është biznesmen që zotëron dyqan me veshje në Shqipëri dhe autobus turistik në Greqi.
Në vitin 2008, kunati i biznesmenit është arrestuar me automjetin e tij nga policia turke, në tentativë për të trafikuar 22 kg heroinë nga Turqia në Greqi. Kunati i J. M., është arrestuar më pas edhe gjatë operacionit të vitit 2017.
