TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Pas disa muajsh vjedhjesh në zona të ndryshme të Himarës, policia ka vënë në pranga 37-vjeçarin Artmir Alinci nga Fushë Kruja, i dyshuar si autor i një serie grabitjesh në banesa, markete, dyqane dhe objekte kulti.
Sipas hetimeve, ai dyshohet se ka marrë para dhe sende me vlerë në Dhërmi, Qeparo, Kuç dhe Himarë gjatë periudhës janar-qershor 2026. Identifikimi dhe arrestimi i tij u bë në kuadër të operacionit policor të koduar “Shëtitësi”.
Burime zyrtare bëjnë me dije se hetimet nuk janë mbyllur ende. Policia dhe Prokuroria po verifikojnë edhe raste të tjera vjedhjesh të ndodhura gjatë të njëjtës periudhë, ku 37-vjeçari dyshohet se mund të jetë i përfshirë.
Njoftimi i plotë i policisë
Finalizohet operacioni policor i koduar “Shëtitësi” Zbardhen një sërë vjedhjesh dhe vijon puna për zbardhjen dhe dokumentimin e disa rasteve të tjera.
Vidhte në banesa, dyqane, markete dhe objekte kulti në territorin e Bashkisë Himarë. Identifikohet, kapet dhe vihet në pranga një 37-vjeçar nga Kruja.
Në vijim të punës për parandalimin e vjedhjeve, zbardhjen e atyre të ndodhura më parë, si dhe identifikimin dhe kapjen e autorëve, specialistët për Hetimin e Krimeve në Komisariatin e Policisë Himarë, pas një pune intensive hetimore, grumbullimit të provave, administrimit të pamjeve filmike dhe kryerjes së veprimeve të shumta procedurale, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Vlorë, në kuadër të operacionit policor të koduar “Shëtitësi”, bënë të mundur identifikimin, kapjen dhe ndalimin e shtetasit A. A., 37 vjeç, banues në Fushë Krujë.
Ky shtetas dyshohet si autor i disa vjedhjeve të ndodhura gjatë periudhës janar–qershor 2026, në zonat Dhërmi, Qeparo, Kuç dhe Himarë. Nga hetimet ka rezultuar se ai ka vjedhur në banesa, dyqane, markete dhe objekte kulti, shuma parash dhe sende me vlerë, në këto zona të Bashkisë Himarë.
Në bashkëpunim me Prokurorinë, vijojnë hetimet intensive për dokumentimin ligjor edhe të disa vjedhjeve të tjera të kryera gjatë kësaj periudhe, për të cilat 37-vjeçari dyshohet si autor. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.
