TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Në 34-vjetorin e themelimit të Partisë Demokratike në Fier, kreu i grupit parlamentar të kësaj force politike, Gazment Bardhi theksoi rëndësinë e bashkimit dhe energjisë së demokratëve për të sjellë një ndryshim të madh më 11 maj.
Duke iu drejtuar demokratëve dhe qytetarëve të Fierit, Bardhi kujtoi sakrificat e viteve 1991, kur kurajoja për ndryshim i dha jetë partisë së parë opozitare në Shqipëri.
Ai u shpreh se historia e PD-së ka treguar se çdo herë që demokratët bashkohen, ata kthehen në një forcë të pathyeshme.
Bardhi akuzoi qeverinë e Edi Ramës për korrupsion dhe përpjekje për të manipuluar qytetarët e Fierit, por ai vuri theksin te vlerat dhe dinjiteti i fierakëve, duke theksuar se asnjë përpjekje për të blerë vota nuk do të ketë sukses.
“Unë kam bindjen se çdo ditë nga sot e deri më 11 maj, ky bashkim dhe kjo energji do të shndërrohen në burim fitoreje dhe shprese për Fierin dhe gjithë Shqipërinë,” deklaroi Bardhi në përfundim të fjalimit.
