AKTUALITET, 4 Shkurt 2023, 11:32

Dyshohet se po transportonte emigrantë drejt Malit të Zi, arrestohet në Shkodër 42-vjeçari, në kërkim dy bashkëpunëtorët

Dyshohet se po transportonte emigrantë drejt Malit të Zi, arrestohet

Një person është arrestuar dhe dy të tjerë janë shpallur në kërkim për transport emigrantësh.

Mësohet se në pranga ka rënë një 42-vjeçar me iniciale D.S, ndërkohë që janë shpallur në kërkim dy shokët e tij një 48 vjeç dhe 30 vjeç nga Lushnja. Këta persona u kapën në flagrancë duke transportuar 16 emigrantë të paligjshëm, por arritën të arratisen. 

Njoftimi i Policisë:

Finalizohet nga DVKM Shkodër dhe nga DVP Shkodër, operacioni policor i koduar “Rrjeta”. Evidentohet dhe goditet veprimtaria kriminale e transportimit të 16 emigrantëve, për kalim të paligjshëm të kufirit, veprimtari që kryhej përmes 3 automjeteve të ndryshme.

Vihet në pranga njëri nga autorët e dyshuar të këtij rasti. Vijon puna për kapjen e 2 bashkëpunëtorëve të tij që duke përfituar nga kushtet e errësirës, iu shmangën shërbimeve të Policisë.

Strukturat e DVKM Shkodër dhe ato të Seksionit për Hetimin e Trafiqeve të Paligjshme dhe Narkotikëve të DVP Shkodër, të mbështetura nga inteligjenca informative, për raste të transportimit të shtetasve të huaj, kundrejt përfitimeve ekonomike, për kalim të paligjshëm të kufirit, kanë organizuar dhe finalizuar operacionin policor të koduar “Rrjeta”, si rezultat i të cilit u arrestua në flagrancë shtetasi D. S., 42 vjeç dhe u shpallën në kërkim shtetasit A. Gj., 48 vjeç dhe R. S., 30 vjeç, të tre banues në Lushnjë.

Në fshatin Vukpalaj, Kastrat, nga 3 automjete kanë zbritur 16 emigrantë të cilët po transportoheshin drejt Malit të Zi, me qëllim kalimin e paligjshëm të kufirit drejt vendeve të BE-së.

Sapo janë konstatuar nga shërbimet e Policisë, 2 nga automjetet janë larguar me shpejtësi dhe drejtuesi i automjetit të tretë, ka braktisur automjetin dhe duke përfituar nga kushtet e errësirës, ka mundur t’u shmanget shërbimeve. Shërbimet e Policisë kanë organizuar menjëherë punën dhe në lagjen “Dobraç”, kanë bërë të mundur ndalimin e njërit prej automjeteve që transportonte emigrantë dhe arrestimin në flagrancë të shtetasit D. S.

Vijon intensivisht puna, për kapjen dhe nxjerrjen përpara përgjegjësisë penale, të shtetasve A. Gj. dhe R. S. Materialet procedurale i kaluan Prokurorisë pranë Gjykatës së Rrethit Gjyqësor Shkodër, për veprime të mëtejshme.